الانتقال بالتبادل هو انتقال بيت طرفين بحيث كل موظف يغير مقر تعيينه مع الطرف الآخر، غير بعض المرات كيوقعو شي أخطاء كتخلينا أيما الطلب يترفض يا أيما المعالجة تعطل، لذلك غادي نحاول نبسّط المسائل النظامية لتتم العملية في سلاسة.
اولا هاد العملية، كتنظمها دورية الحركة الانتقالية رقم 31 بتاريخ 8 ماي 2014 .
اش كتقول الدورية.. ؟
الانتقال بالتبادل هو انتقال استثنائي، كيكون خارج الحركة الانتقالية الاعتيادية، يعني ايلا كاينة الحركة الانتقالية الاعتيادية.. متعمرش التبادل، حتى تسالي.
ثانيا، مديرية الموارد البشرية، بصفتها المسؤولة عن المعالجة المركزية حاطة شروط واجب احترامها و مهمة لكي يتم قبول الطلب، ما فيها بأس نذكروها :
- بجوجكم تكونو مرسمين titulaire؛
- بجوجكم تكونو على الأقل قضيتو 6 أشهر فمقر التعيين الحالي؛
- بجوجكم تكونو من نفس الإطار (مثلا : إطار ممرض ، اطار متصرف، اطار مهندس،.. الخ)؛
- يكون عندكم نفس التخصص،
- فرق الاقدمية بيناتكم ميفوتش 10 سنين (باش ميكونش البيع و الشرا بين واحد بقات ليه 6 أشهر للتقاعد و واحد ي الله قال بسم الله فالوظيفة العمومية)؛
المسطرة :
مديرية الموارد البشرية وفرت واحد المطبوع، كتعمرو نتا و المرشح لي بغيتي تبادل معاه (انظر الصورة)، كيكون المعلومات ديالك و ديال الطرف الآخر.
كتعمر المطبوع 2 مرات ( اي في نسختين)، المرة الأولى كتعمر الجزء العلوي و المرة الثانية الجزء السفلي.
من بعد ما الطرف الآخر ملء تا هو في نفس المطبوع فالجزأين المتبقيين، واحد فيكم يتكلف من جهتو يدفعو الإدارة من أجل الدراسة و المعالجة.
من بعد يتم ارسال الطلب الى المديرية الجهوية من أجل إبداء الرأي، و ايلا كان المرشح لي بيتي تبادل معاه فمندوبية خارج الجهة لي فيها نتا، يتم ارسال الطلب إلى المديرية لي فيها هو و لي بالدور ديالها كتصيفطو المندوبية من أجل دراسة الطلب.. الخ الخ..
هاد العملية كتخلي الطلب ديالكم ياخد الوقت بسير و جي و لا يتجلى و كتوقع بزااااف.
من الأحسن، انه واحد فيكم يتكلف، يشد الطلب و يديه للمندوب ديالو، و من بعد المدير الجهوي ليتابع ليه و يعطيه للمترشح 2 من أجل نفس العملية عاد يدار ليه ورقة إرسال إلى مديرية الموارد البشرية.
(*) تأكدوا أن لا المندوبين لا المديرين كتبو رأي صريح ( avis favorable و لا avis défavorable, ماشي توقيع فقط أو sous réserve de remplaçant لأنه ماعندها تا معنى، هاد المسألة كتوقع بزاف و كتخلي الطلب ديالكم يرجع من المديرية موارد البشرية للمندوبيات باش يعاود يتصحح و بحال بل ما درتو والوا.
(*) كنصحكم ديما تخليو فوطوكوبي معاكم.. كتنفع! المسطرة في اسوء الأحوال كتاخد 2 أشهر أو 3 على الأكثر باش يرجع ليك الرد أيما بالقبول أو الرفض أو تصحيح معلومة أو شئ من هاد القبيل.
(*) الممرض متعدد التخصصات و الممرض المساعد Infirmier auxiliaire يمكن ليهم يتبادلو واخا ماشي نفس الإطار، و لكن كيقومو بنفس الأعمال تقريبا.الفرق في الدرجة ماشي مشكل. نتا ممرض درجة 1 و هو ممرض درجة ممتازة، لا يمنع الاستفادة، المهم احترام التخصص.
المراجع و المصادر :
- الظهير الشريف 1.58.008 بشأن النظام الأساسي للوظيفة العمومية؛
- الدورية الوزارية 31 بتاريخ 8 ماي 2014 المتعلقة بالحركة الانتقالية لموظفي وزارة الصحة؛
- دليل مساطر تدبير شؤون الموظفين بالمصالح اللاممركزة.
إرسال تعليق
أكتب رأيك في الموضوع